2019: Por um bom ano para a reorganizaçom comunista galega

Galiza em Rede, coletivo de comunistas com participaçom em diferentes campos do movimento popular galego, leva três anos de trabalho conjunto de debate e consolidaçom, como contributo para a reorganizaçom da esquerda independentista galega.

Vivemos umha etapa histórica de forte retrocesso das forças revolucionárias e progressistas em todo o mundo, com um capitalismo espanhol em crise, que tenta impor um programa ultrarreacionário contra a classe trabalhadora e contra os nossos direitos nacionais.

Num contexto como esse, em que a esquerda institucional parece resignada a gerir a escassa influência que o sistema lhe conceda, a própria subsistência de grupos de militantes e ativistas de esquerda revolucionária como o nosso, com presença e trabalho social contrastado, é umha pequena vitória de que também podemos orgulhar-nos.

Sabemos bem que nom somos o único coletivo empenhado em idênticos objetivos estratégicos para o nosso país: a independência, o socialismo e a superaçom da opressom patriarcal. Isso é mais um motivo para a continuidade do trabalho paciente de consolidaçom de um campo marxista de libertaçom nacional.

Além do trabalho no movimento popular (sindical, feminista, cultural, juvenil…), as e os camaradas do nosso coletivo tenhem realizado atividade formativa interna e debate político de conjuntura, com o intuito de pôr as bases da reconstruçom e fortalecimento de um movimento político ao serviço da classe trabalhadora galega e da sua emancipaçom.

Quando acabamos o nosso terceiro ano de atividade, recebemos 2019 com a decisom coletiva de avançar na construçom orgánica de umha corrente comunista, independentista e feminista, ao serviço do povo trabalhador galego.

Esperamos que o novo ano permita dar passos concretos, integrando mais camaradas numha dinámica de reorganizaçom tam necessária como impostergável.

Por um bom ano de luitas para o nosso povo trabalhador!

Galiza, 31 de dezembro de 2018

Comité do Coletivo Comunista Galiza em Rede

Deixe uma resposta

(*) Required, Your email will not be published